श्रीरामकृष्णस्तोत्राणि

श्रीरामकृष्णारार्तिकम्

भवबन्धन भयखण्डन ! शुभवन्दन ! वन्दे ।
गतरञ्जन ! भवभञ्जन ! निहितनयन ! मन्दे ॥

गुणमयवर ! निर्गुणनर ! नवमानवरूपिन् ।
अघदूषण गणमोचन ! जगभूषणरूपिन् ॥

ज्ञानाञ्जन विमलनयन ! वीक्ष्य मोहनाशिन् ।
भास्वरभाव सागरमग्न शशिसुविशदहासिन् ॥

भक्तार्चितचरणयुगल ! भवसागरतारक ।
जृम्भितयुग ! ईश्वर ! जगदीश्वर ! नयकारक ॥

तव कृपया प्राप्तसमाधानमनाः पश्यन् ।
अस्मि कर्मकाठिन्यं करुणाघन ! हृष्यन् ॥

भवतारण-प्राणार्पण ! भयहर ! कलिकृन्तन ।
अतिनिन्दितकरणराग-वञ्चन कामकाञ्चन ॥

त्यागीश्वर ! हे नरवर ! देह पदामोह ।
निर्भय ! गतसंशय ! दृढनिश्चय गतलोह ॥

निष्कारण भक्तशरण ! त्यक्तजातिमान ।
सम्पन्मम तव चरणं भवगोष्पदमान ॥

प्रेमार्पणसमदर्शन ! दुःखमेतु विलयम् ।
तव गानं गतमानं विलसत्वाविलयम् ॥

नमो नमोऽवाङ्मनसगोचर मतिवचनैकाधार ।
ज्योतिर्ज्योतिषोऽपि हृत्कन्दरतमसो वर संहार ॥

धिक् तान् धिक् तान्वदति मृदङ्गो ये न पदं ते प्रणताः
गायन्त्येते भक्तजनास्ते ह्यारार्तिकं प्रविनताः ॥

जयतु जयत्वार्तिकमेतत् तव शम्भो ! शिव ! हर ! हर !
आनन्देनानूदितमभवत् गानमिदं ते शङ्कर ॥

❀ ❀ ❀


वङ्गभाषायां श्रीस्वामिविवेकानन्दविरचितश्रीरामकृष्णारार्तिकस्य न्यायाचार्येण पण्डित – ‘आनन्दझा’ इत्येनेन कृतः संस्कृतनुवादः ।