श्रीरामकृष्णस्तोत्राणि

श्रीश्रीरामकृष्णस्तोत्रम्

जगज्जातं त्यक्तं हिमगिरिसुतापादकमले
        शरीराद्याः प्राणा बलय इव येनार्पणमगुः ।
त्रिवर्गो यच्छ्रद्धाविमलगुरुभक्त्या हि सुलभो
        नुमो रामकृष्णं सुरनुतपदं भेदरहितम् ॥१॥

स्वयं त्यक्तं प्रोक्तं हृदयकरशाखोल्लिखनतः
        पुरा रामात्कृष्णः समभवदनन्यो नहि परः ।
इदानीमायान्तं नयनविषयत्वं जनिभृतां
        प्रविष्टो देहेऽस्मिन्निति कनककामातिगतया ॥२॥

यदद्वैतं शान्तं सततमघमायाविरहितं
        चिदानन्द शुद्धं प्रकृतिसहितं प्रेमवशगम् ।
त्वमेवाविर्भूतं करणविषये दुर्लभतरं
        जगज्जीवैः क्रीडन्महदमितवीर्यं रसतमम् ॥३॥

त्वमेव श्रीरामो मधुरिपुहरिर्गोपतनयः
        स्वयं भूतश्चाद्यः परमपुरुषो नाथ रमण ।
विवादं धर्माणां शमयितुमनाश्चिन्मयवपुः
        प्रसन्नो लोकानां प्रकटितमकार्षीः पुनरिह ॥४॥

त्वदीयांङ्घ्रि द्वन्द्वक्षरितमकरन्दं प्रतिदिशं
        सदा पायं पायं कलितभवभीति प्रशमयन् ।
भजन्साम्यानन्दं विमलहृदयो याति परमां
        जनानां सङ्घोऽयं निखिलभुवि शान्ति मुहुरहो ॥५॥

समाधावानन्दं पुनरति विशुद्धं हरिकथा-
        प्रसङ्गादुद्बुद्धं करणगणरोधं प्रविवहन् ।
नराणां भक्तानां हृदय पुलकानां प्रतिदिनं
        समाधानं चक्रे य इह शरणं मेऽस्तु सततम् ॥६॥

ध्रुवा मूर्तिर्गङ्गा तटपरिगता या गुणमयी
        गुणातीतापि स्यान्ननु लसति दक्षेश्वरमणिः ।
ब्रजन्ती गायन्ती भवतरणिमातुर्गुणकथाः
        सदा स्वान्ते सा मे स्फुरतु रमणीया द्युतिमयी ॥७॥

कृपापीयूषाम्भः पतितमधिकं पातकिजने
        दयासिन्धो मन्दे रसिक चतुरप्रीतरसिके ।
दरिद्राणां बन्धो ! तव विदुरगेहे सुखलवाः
        समर्थो निर्णेतुं क इह महिमानं ननु बुधः ॥८॥

समुद्धर्तुं लोकान् स्वयमधिगतिस्ते प्रतिगृहं
        क्व देवेन्द्रादीनां वसति भवनं कह शशधृक् ।
गुणानां साधूनां त्वयि निवसनं भो गुणधर
        स्मरामो नित्यानामपि निरभिमानं निरुपमम् ॥९॥

नियन्ता जीवानामपि शिशुवदेवानुनटसि
        स्वतन्त्रः सर्वेषामिव चरसि देवीपरगतः ।
अभिज्ञाता विश्वं भणसि ननु मूर्खाभिध इति
        प्रियां ते जानीमो निजसकलगुप्तिं नटवर ॥१०॥

नमो रामैक्यायामितमधुरदेवीमयतनू-
        भृते कृष्णैक्याय श्रुतपरमहंसाय यतये ।
नमश्चन्द्रामण्या प्रियतनय देवाय गतये
        नमः सर्वस्वाय प्रणयिखुदिरामस्य मणये ॥११॥

इयं स्तुतिकथा पूजा रामकृष्णे परे गुरौ ।
        अर्पिता तेन देवेशः प्रीयतां परमेश्वरः ॥१२॥

इति श्रीश्रीरामकृष्णस्तोत्रम् ब्रह्मचारिमेधाचैतन्येन विरचितम् ।

❀ ❀ ❀