श्रीरामकृष्णस्तोत्राणि

श्रीरामकृष्णषट्कम्

विशुद्धविज्ञानमगाधसौख्यं,
        विश्वस्य बीजं करुणापयोधिः ।
अनाद्यनन्तं प्रकृतेः परस्तात्
        तत्तत्त्वमेकं भुवि रामकृष्णः ॥१॥

न नेति मिथ्या श्रुतयो वदन्ति,
        वदन्ति साक्षान्न च यं कदाचित् ।
चिदेकरूपः शिव ईश्वराणां,
        महेश्वरोऽसौ भुवि रामकृष्णः ॥२॥

यं नित्यमानन्दमनन्तमेकं
        शिवेति नाम्ना श्रुतयो गृणन्ति ।
तस्यावतारो नररूपधारी
        कृपासुधाब्धिर्भुवि रामकृष्णः ॥३॥

विज्ञानपीयूषनिमग्नमूर्तिः
        पस्पर्श यान्यान्दयया करेण ।
ते कामिनीकाञ्चनरिक्तचित्ताः
        सद्यो बभूवुर्भुवि रामकृष्णः ॥४॥

प्रेमाब्धिगम्भीरतरङ्ग-भङ्गैः
        आन्दोलितो यो भगवद्विलीनः ।
भक्तिर्विशुद्धा स्वयमाविरासीत्
        पुंविग्रहोऽहो भुवि रामकृष्णः ॥५॥

तमद्भुतं कञ्चिदचिन्त्यशक्तिं
        वन्दे प्रशान्तं परिपूर्णबोधम् ।
ज्ञानस्य भक्तेश्च विशुद्धमूर्तिं
        द्विमूर्तिमेकं भुवि रामकृष्णः ॥६॥

❀ ❀ ❀


वङ्गाब्द १३३९ श्रावणमासस्य “उद्बोधन”-पत्रिकायाः ३४तमवर्षीयसप्तमसङ्ख्याया गृहीतम् ।