श्रीरामकृष्णस्तोत्राणि

श्रीरामकृष्णस्तोत्रम्

स्वयं निर्मलं निर्मलीकर्तुमन्यानलं सिद्धमप्युच्चसिद्धिप्रयासम् ।
        प्रपन्नार्ति-नाश-प्रसन्नान्तरं तं, भजे रामकृष्णं परब्रह्मरूपम् ॥१॥

सदान्तर्लसत्सर्वसद्भावभावं, जगच्छान्तये विश्वधर्मप्रकाशम् ।
        मुदान्तः प्रविष्टाखिलास्वप्नवृन्दं, भजे रामकृष्णं परब्रह्मरूपम् ॥२॥

अविद्यान्धकारा-पहार-प्रहारं स्वभक्तानुकम्पाप्रसक्तान्तरङ्गम् ।
        अवस्था गुणादिव्यतीतस्वरूपं प्रभुं रामकृष्णं शिवं सन्नतोऽस्मि ॥३॥

स्मृतिः केवलं तेऽहसां नाशहेतुः स्तुतिर्मानसं मानसम्मोद-पूर्णम् ।
        करोति; ध्रुवं दर्शनस्पर्शनादेः फलं भाषितुं कोऽस्त्यलं देवदेव ॥४॥

विवस्वत्प्रकाशाः पयोघेस्तरङ्गा यथाकाशगास्तारकाः सन्त्यमेयाः ।
        असङ्ख्यास्तथा यद्गुणानां गणास्तं भजे रामकृष्णं परब्रह्मरूपम् ॥५॥

विकारहेतावपि निर्विकारं साकारमप्याकृतिशून्यभावम् ।
        ज्ञानोपदेशैः सुकृतोपकारं, श्रीरामकृष्णं शिरसा नतोऽस्मि ॥६॥

“यथाम्बुधिं यान्ति विभिन्न गङ्गास्रोतांसि, धर्मा अपि देवदेवम्” ।
        येनोपदिष्टं निजसाधनाभिस्तं रामकृष्णं शिरसा नतोऽस्मि ॥७॥

त्वमेव साक्षाज्जगदात्मरूपस्त्वमेव कार्य परकारणं वा ।
        अनुग्रहैकार्थपरं परात्मन् करोम्यभीक्ष्णं शरणं कमन्यम् ? ॥८॥

स्तोत्रमिदं साहित्याचार्य एम्. ए. श्रीभण्डारकरोपाह्वेन त्र्यम्बकशर्मणा विरचितम् ।

❀ ❀ ❀